Какүта Мицүёо- Ашгүй,та ирэвүү?(Ⅰ)

Энэ тухай ярихын өмнө,эхлээд өөрийнхөө  ичгүүртэй явдлыг тайлбарлах хэрэгтэй болох нь.Би  хэнд ч үүнийг ярьж байгаагүйн учир нь тэрхүү ичгүүрээ дэлгэхийг хүсээгүйнх билээ.Гэхдээ энэ удаад бол яасан ч байсан үүнийг яринаа.
Маргааш гэхэд хар элгийн хүн болох чи минь,царайгаа барайлган хаалгаа онгойлголоо.Хоёр гартаа шилтэй хүйтэн шар айраг, шилэн аяга барьсаар унтлагын өрөөнд орж ирээд шалан дээр завилан суув.Хүйтэн шал жинсэн өмдний дороос хайрахад,халаагуур залгаагүй байгааг сая анзаарлаа.Би удирдлага руу гараа сунгаж,халаагуурыг асаалаа.
~За уухуу даа гээд шилэн аяганд алтлаг шингэнийг хундагалав.Тэхий дундуураас дээгүүр шингэн дүүртэл,ход ход инээх мэт чимээ гарна.Түүнээс,хэтрэнгүүт,тэрхүү чимээ нам гүм болж,цааш олон жижиг хөөс алтан шаргал өнгөнд сүлэлдэн чимээгүй дээш хөөрнө.Хөшсөн чигээрээ чи минь харах боловч,арга тасарсан мэт,үгүй ээ,магад нигүүлсэнгүйгээр чанх өмнө минь сууж,усан болороор цантсан хундaгaa гартаа өргөнө.Бид ямар нэг баярт үйл явдал тохиох адил хундaгаа тулгахад,шил тас хийж,цацрах чимээ цуурайтлаа.
Тэр үед би дөнгөж хорьтой,нэгэн навсгар модон байранд амьдардаг байв.Гал тогоо,жорлон нь нэг дороо,усны өрөө ч үгүй нэг тийм байр...Нэг улирчихаад,жилийн өмнө их сургуульд элсэн орж,хотод ирээд удаагүй байлаа.Тухайн үед ядмагын туйл л байлаа шүү дээ.Цагийн ажил хийх нь хийж байсан л даа.Гэхдээ авсан мөнгөө бүгдийг нь кино,ном,нийллэгт өгөөд барчихна.Тэгээд,тэр үед би гэдэг хүн дээд ангийнхаа оюутан охинд дурлачихваа.Дандаа л өөр оюутан залуу  дагуулчихсан явдаг, гоё охин байв.Түүний анхаарлыг татахын тулд хувцас авахгүй бол болохгүй,дээр нь болзоонд явахад хүрэлцэх мөнгө хураах хэрэгтэй боллоо.Гэрээс явуулсан цөөхөн хэд,цагийн ажлын хөлсөөр үнэндээ яагаад ч бүгдийг төлж барахгүй нь мэдээж шүү дээ.Байрны маань хөрш хаалганд ,Күсакабэ гэдэг залуу амьдардаг байлаа.Мөнгөн хүрээтэй нүдний шилтэй,даруухан, унжийсан амьтан,надтай нэг сургуульд физикийн ангид сурдаг байсан юм.Тэгтлээ дуртай залуу байгаагүй ч,гал тогоонд тааралдах бүр ,тэрээр хэзээ язааны юм шиг яриа өднө.
~Боломжийн цагийн ажил байна,хийхгүй биз?
Сургуулийн зуны амралт эхэлснээс хэсэг хугацааны хойно,гал тогоонд тэрээр надад ингэж хэллээ.Байрны оюутнуудын ихэнх нь гэр рүүгээ буцчихсан,хонгилд ч,гал тогоонд ч нам гүм...




Завхөн зуны амралтын хугацаанд хийсэн ч болно шүү! гэж Күсакабэ хэллээ.Бэлэн гоймон хийнгээ Күсакабэгийн яриаг сонсвол,сурталчилгааны хуудас тараах ажил байлаа.Айл айлаар ороод,товхимолоо тэр гэрийн хүний гарт нь дамжуулах маягийн ажил...Амархан ажил гэхэд,амалсан цалин нь гайхалтай сайн байлаа.Бас шөнө дөл болтол уушийн газарт ажиллаж олдог мөнгөнөөс хэдэн мянган иэнээр өндөр...Түүгээр ч барахгүй,заасан тооноос илүү олныг тараавал,ахиад тодорхой хэмжээний нэмэгдэлтэй,товхимолд орсон бараанаас захиалвал,нэмэгдэл нь бүр ахиу болно гэв.
~Хийе,гэж би ухас хийн хариуллаа.
Нийтийн гал тогоонд бэлэн гоймон сорж буй надад ,Күсакабэ өнөөх товхимолын загвараа авчирч байгаад ,нүдний шилээ дээш доош хөдөлгөн тэр нь чухам юу болохыг тайлбарлаж гарав.Сэжиг бүхий шашны байгууллагын сурталчилгааны сэтгүүл байлаа.Хэзээнээс,мөн ямар хувь төөргөөр гэдгийг нь мэдэхгүй ч,Күсакабэ тэр шашныхаа сүсэгтэн нь бололтой байлаа.Нарны гэрэл,огторгуйн хэлбэлзэл,бурханаас дээш орших их бурхан,бузар булай,бурханы рашаан...Бэлэн гоймон сорж буй миний өмнө үнэн итгэлтэй бурах Күсакабэгийн яриаг чихнийхээ хажуугаар урсгаж байлаа.Үнэнээсээ сонсоогүй гэхэд,тэгтлээ жихүүцэж барьсангүй.
~Янз бүрийн амьтан байх юмдаа...,тэгж л бодогдож байлаа.
Гоймонгоо идчихээд өрөө рүүгээ буцтал,Күсакабэ миний өрөөнд өчнөөн цаасан хайрцаг зөөж ирэв. Бүгд өнөөх товхимолоор пиг дүүрэн.Зөөгөөд дуусчихсан байж муу юм чинь гарахгүй,тэр шашин нь хичнээн үнэн зөв хийгээд шүтээгүй хүн ямар үйлийн үрд унах тухай ярихыг завдав.Би түүнийг хөөж гаргаад,агааржуулагчгүй муу харанхуй өрөөндөө товхимолыг шир шир  хийлгэн эргүүлж үзлээ.Эв хавгүй зурсан зурагтай(манга),өвчин эдгэрлээ,нурууны өвчин эдгэлээ гэх мэт бодит явдлын тайлбартай,шашныг үндэслэгчийнх нь номлосон сургааль,шашны байгууллага нь зардаг боловуу гэмээр эрүүлжүүлэх хүнсний барааны зар байв.
~Янз янзын амьтан ч байх юмдаа.
Өөрөө ч багтахгүй юм шиг дахин бодлоо.Тэгээд Күсакабэгийн амласан өдрийн орлого нь арав хоногт төд,хоёр долоо хоногт төд гэж тооцоолж үзэж суув.Уушийн газрын ажил оройноос эхлэх юм чинь,товхимолоо тэрний өмнө нь тараагаад явбал болно.Зун дуусах үеэр,туйлгүй ядуу байдал маань арай дээрдсэн байхаар тооцоо гарлаа.Тэр оройноо би Чикада Хироко(дээд ангийн гоо бүсгүй) руу залгаад,болзоонд урив.Чикада Хироко бол нэртэй ресторан мэт бүтэн сарын дараа ч болзооны урилгатай байгаа гэдгийг мэдэж байсан болохоор найман сарын сүүлээр амлалтыг нь авахаар санаархаж байлаа.Тэр үед,уушийн газрын цалин,товхимол тараасан хөлс маань нийлээд тансаг болзоо хийчих хуримтлал болох ёстой байлаа.Харилцуурын цаанаас тэмдэглэлийн дэвтэрээ шаржигнуулан эргүүлэх чимээ гарч,
~Болох юм байна,найман сарын гучин гэвэл хоосон байна…гэж Чикада Хироко хариуллаа.



Япон хэлнээс орчуулсан А.Дайрийжав


☆үргэлжлэл бий

зургийг дараахи хуудаснаас авав.→http://blog.livedoor.jp/nsg3/archives/51696627.html

Нэгэн радио нэвтрүүлгийн тухай

Дараагийн орчуулсан зүйлээ сонирхуулах хүртэл бяцхан завсарлага аваад,Японы сонин хачин,шийр зугаа гэж..  өөрийн сонсох дуртай Японы нэгэн радио нэвтрүүлгийн тухай танилцуулъя.

Нэгэнт ном,зохиол,орчуулгын тухай зүйлс бичиж байгаа тул,энэ удаад хөгжмийн радио биш гэдгийг урьдчилан хэлсэн нь зүйтэй боловуу?

Сургуульд заадаггүй,сурсан ч мартчихсан зүйлсийг хөгжилтэй аргаар сургах нэвтрүүлэг-Гакүмонно сүсүмэ гэдэг уриагаар эхлүүлдэг уг нэвтрүүлэгийг та бүхэнд танилцуулж байгаадаа баяртай байна.

Японы нэртэй оюуны уран бүтээлчид болох эрдэмтэн,зохиолч,сэтгүүлч,судлаач,жүжигчин,манга зураач,яруу найрагч,түүхч,орчуулагчидыг голлон урьж оролцуулдаг ”Гакүмон-но-сүсүмэ”гэдэг уг нэвтрүүлгийг,орон нутгийн радио сувгууд,интернэт суваг,мөн I-Tunes App－ийг ашиглан хүлээн авч сонсож болно.

ラジオ版　学問のススメ Ражио бан Гакүмонно сүсүмэ

url→　http://www.jfn.co.jp/susume/

Японы эрдэмтэд,зохиолчид,голдуу шинэхэн хэвлэгдсэн ном,бүтээл,мэдээлэлээ хүргэдэг,танин мэдэхүйн нэвтрүүлэг юм.

Нэвтрүүлэгт танилцуулах шинэ зохиол бүтээлүүд нь нийгмийн онцгой сонирхолыг татсан,цаг үедээ нийцүүлсэн ,холбогдолтой шинэ соргог мэдээллээр дүүрэн байдаг нь хамгийн том онцлог боловуу?

Мөн шинэ бүтээлээс гадна ,уг уран бүтээлч,зочин маань ямар хүн бэ гэдгийг ярианаас нь давхар мэдэж болох мэт санагддаг.

Нэвтрүүлгийн эхэнд,зохиогчын танилцуулга,шинэ бүтээлийн тухай,2011оны3сарын11нд болсон их  газар хөдлөлт, цүнамигаас хойших ирээдүйн Япон орны тухай, тухайн хүний үзэл бодол,эрэгцүүллийг сонсоно.

Гакүмонно сүсүмэ-г орчуулвал Эрдэмд хөтлөгч гэдэг үг ойртож очих боловуу.

Хамгийн сүүлчийн бөгөөд заавал асуудаг маш сонирхолтой асуулт бол 
<<Таны хувьд хамгийн сэтгэлд шингэсэн багш тань хэн бэ?>>юм.

Дээрхи олон арван Японы хүмүүсийн хариулт бүр адилгүй ч нийтлэг нэг л зүйлийг хэлж байсан нь юу вэ гэхээр...


<<..бага ангийг маань удирдаж байсан ...багш маань л намайг энэ замруу хөтөлсөн>>гэж ярьж байсан юм.

Тэгэхээр анхны багш гэдэг ирээдүйн замыг зөв чиглүүлж чадах,эсвэл зайлшгүй чадагч чухал хүмүүсийн нэг юм гэдгийг ойлгож авч болохоор байгаа биз?

Энэ талаар та юу гэж бодож байгаагаа ,сэтгэгдлээ хуваалцахыг хүсье.

Интернэт хаягаар нь орж,сонсвол 2006оноос хойших бүх нэвтрүүлэг нь хадгалагдаж байдаг юм билээ.

Зүс царайнаас гадна ,манай урлагийн алтан од Дагийранз гуайтай адил эр хүний баргил сайхан цээл хоолойгоор ярьж,соронзон мэт яриагаараа бүтэн цаг гаран бүхний сэтгэлийг урин татагч,хөтлөгч Гамада Кэн ахын тухай дор товч танилцуулъя.

Гамада Кэн

Гамада Кэн

1966оны 3сарын19нд төрсөн.

Хоккайдогийн их сургуулийн утга зохиолын ангийг төгссөн.

TV,Радиогийн нэвтрүүлгүүд,тайлбарлагч,хөтлөгч,DJгэх мэт олон салбарт ажилладаг.

Юуны түрүүнд анзаарсан зүйлээ онцолж хэлэхэд уг нэвтрүүлгийг бэлтгэхэд зочины тухай,түүний шинэ бүтээлийг сайн судалж,хаанаас юуг нь олж асуухаа маш сайн мэдэж,мэдэрсэн ,авъяаслаг хөтлөгч,мөн сайн сонсогч юм гэдгийг хэлэх хэрэгтэй байх.

Оролцогчийн мэддэгийг мэдэж,мэдүүлэх гэснийг нь алдалгүй зөв олж, ийм чадварлагаар гол санааг нь гаргаж асууна гэдэг,жинхэнэ хөтлөгч хүний ур чадварыг харуулж байгаа юм.

Би энэ нэвтрүүлгийг 2010оны намраас сонсож эхэлсэн цагаас,энэ хөтлөгч,энэхүү нэвтрүүлгийн  байнгын сонсогч,өөрөөр хэлбэл шүтэн бишрэгч нь болсон билээ.

 Хэрэв та Япoн хэл гадарладаг бол цаг заваа ашиглаад заавал сонсоод үзээрэй.

Зохиолч Хаяаши Марико

Зохиолч Хаяаши Марико
(жинхэнэ нэрТоого Марико)

1954оны 4дүгээр сарын 1нд Яманаши мужид төрсөн.

Эцэг ,эх нь номын дэлгүүр ажиллуулдаг байсны нөлөөгөөр багадаа маш их ном уншиж байсан нь ирээдүйд зохиолч болох үндэс,суурийг тавсан гэдэг.

1976онд ,,Нихон Дайгакү,,их сургуулын урлагийн салбарын утга зохиолын ангийг төгссөн.

1982онд ,,Рүн Рүнийг удалдаж аваад гэртээ харъя,, эссэ-г хэвлүүлсэн нь бест-селлэр болсон.

1986онд ,өмнөх жил нь нийтэлсэн ”Сүүлчийн нислэгт амжвал”, ”Кёото хүртэл” зохиолоороо уран зохиолын дээд шагнал болох 94 дэх удаагийн Наокигийн шагналыг хүртжээ.

Эмэгтэй зохиолчдын бүтээл төдийлөн орлоготой зохиолоор шалгардаггүй байсан тухайн үед энэхүү зохиолоороо олны танил болсон байна.

1995 онд 8дахь удаагийн Шибата Рэнзабүро(1917-1978)гийн нэрэмжит шагнал,
1998 онд 32дахь удаагийн Ёшикава Эйжи (1892-1962)гийн нэрэмжит утга зохиолын шагналыг тус тус хүртсэн.

Японы утга зохиолын дээд шагнал болох Наокигийн нэрэмжит шагнал болон бусад олон утга зохиолын шагнал олгох комиссын шүүгч,гишүүн.
Японы алдартай эмэгтэй зохиолчдын нэг билээ.

Түүний тоолж баршгүй зохиол бүтээлүүдээс харамсалтай нь нэг ч зохиол уншиж амжаагүй байгаа хэдий ч "20насандаа амжиж уншмаар нэртэй зохиолууд" ,(2002он”Бүнгэй Шюнжюү”хэвлэлийнгазар) хэмээх зохиолын танилцуулга,эрэгцүүллийн тухай уг номыг уншаад,бага боловч Монгол уншигчидад танилцуулахсан гэсэн хүсэлд хөтлөгдсөн нь энэ билээ.

Уг номд нийт Япон болон дэлхийн алдартай зохиолчдын 54 бүтээлээс зохиолч өөрөө сонгон танилцуулжээ.

Жишээлбэл:

Emily JaneBrontë-Wuthering Heights,(Англи)

Gabriel José GarcíaMárquezーChronicle of a Death Foretold,(Колумби)

Francis Scott KeyFitzgerald-The Great Gatsby,(Америк)

Миүра Аяако-Хёотэн,(Япон)

Jerome DavidSalinger-Catcher in the Rye,(Америк)

Marguerite Duras-L'Amant,(Франц)

Дазай Осамү-Ша-ёо(Япон)

Ишихара Шинтаро-Тайёо-но-кисэцү (Япон)

...гэх мэт.

Үүн дотроос сонгож,гурван зохиолын танилцуулгыг орчуулан, өмнө нь блогтоо нийтэлсэн билээ.

20 нас гэдэг ертөнцийг өөрийнхөөрөө таних гэж оролдож,хоёр хөл дээрээ арай ядан тэнцэж,том хүний эгнээнд орж,амьдралын харгуйд шинэхэн мөрөө гаргаж,бусадтай адил хариуцлага гэдгийг үүрч,анхны хайраас амьдралын ханиа олж авдаг,сэтгэлийн хамгийн эмзэг,нарийн мэдрэмтгий нас бөгөөд,хүний амьдралын дахин давтагдашгүй сайхан үе гэж би ойлгодог.

Удахгүй энэ 20 насандаа баяртай гэж хэлэх өдрийг тоолон суугаа миний бие,энэхүү номыг уншаад,арай илүү эрт эдгээр зохиолуудыг уншсан бол 20нас минь уярал,ухаарлаар мялаалган,илүү утга учиртай өнгөрөх байсан байх даа гэж өөрийн эрхгүй бодсон билээ.