Ашгүй та ирэвүү(Ⅳ)

　　　

　Тэр эмэгтэйтэй учирсан тухайд гэвэл найман сар гараад л даа.
Жэй Аар(Жапан Рэйлвэй) улсын галт тэрэгнээс хувийн галт тэргэнд суугаад,бас л бууж үзэж байгаагүй,нэрийг нь ч мэддэггүй байсан буудалд буун,хорооллоор үхтлээ алхаж байхдаа...хашлагатай айлын хонхыг дарлаа.Хариу алга.Эзгүй юм боловуу гээд явах гэтэл~Заа заа,очлоо.. гэх шингэхэн дуу сонсогдлоо.Бүр яг сонсогдлоо.Тэгээд,хашаа байшингийн завсрын нарийн замыг туулж,араар нь тойрч үзлээ.Өвдөг хүртэл өндөр ургасан өвс,хогийн ургамалтай замаар өнгөртөл  ер цэвэрлэж,гар хүрээгүй давчуу цэцэрлэг байлаа.Цэцэрлэг рүү харсан цонхтой сэрүүн тавцан байх бөгөөд ялимгүй нээгдсэн шилэн хаалганд нь хулсаар хийсэн нарны халхавч бэхэлжээ.Тэрхүү цонхны завсар руу чиглүүлээд өнөөх л үгээ хэллээ.~***их сургууль,нийгэм судлалын ангийн нэгдүгээр курсын Кавасаки байна.Юу л даа,семинарын бүрэлдэхүүнд оруулж санал асуулга явуулж байгаа юмаа.Шилэн хаалга аяархан нээгдлээ.　　　　　　　

　　　　　　　　　　　　　　　

　　　　

Тэгээд,нэлээд намхан эмгэн гарч ирэв.~Өө,ашгүй та ирэвүү?Эмгэн надруу хараад  ер гайхсан шинжгүй ингэж  хэллээ.~Та ирэвүү гэнээ?Буруу л сонслоо доо...?! гэж бодоод сэрүүн тавцан руу өлийж байгаад цаасан торноос эмхэтгэлээ гаргаж ирлээ.
~Нөгөө,~энэ,~боломжоороо уншаад үзээрэй.Шилэн хаалгаа дэлгэсэн чигтээ  эмгэн тэр дороо цэмцийн суугаад эмхэтгэлийг авангаа ,~Халуун байгаа биздээ,Наанаа хөшөөд байлгүй дотогшоо орсон нь дээргүй юу?гэж хачин тайван дуугаар хэллээ.Эмхтэгэлээ тарааж эхлээд хэдэн долоо хоног өнгөрөхөд ийм хүнлэг дуу хоолой сонсоогүйг хэлэхүү,ядарсандаа тавцандээр суулаа.Нарны халхавчны завсраар нүд гүйлгэтэл бүүдгэр Япон маягийн өрөө цэлийж байлаа.Зурагттай,түүний өөдөөс нь харуулсан эвхдэг ортой,өрөөний чанх голд нь цайны явган ширээ тавьжээ.~Эвгүй газар суугаад,яадаг хүн бэ?гээд муур хүрхрэх мэт хоолойгоор эмгэн инээгээд хором хэртээ зүтгэлж байж өндийж аваад цааш явж одлоо.Хөл муутай юм боловуу даа,баруун хөлөө чирээд,алгуур алхалж байхыг бодоход...Бүр нэлээд хормын дараа эмгэн модон царан дээр шилэн аяга,лонхтой шар айраг тавиад эргэж ирлээ.Хулсан шалан дээр цараа тавиад,~За,энийг танд!!!гээд нимгэн шилэн аягыг надад бариулав.Тэгээд хоёр гараараа лонхыг өргөж,бага багаар шилэн аяганд шар айргийг хундагаллаа.Өнөөдөр ч ер нь л одтой байна шүү.Яг ам цангачихсан байсан юм.Эмгэний хийж өгсөн шар айрагны ихэнхийг нь нэг амьсгаагаар хөнтөрчихлөө.Тэрээр дахиад хоёр гараараа лонхыг дээш өргөлөө.Бүр нэг хичээнгүйлэн байж хундагалаад,түүнийг нь амандаа ойртуулж барихыг минь нүдээ жоотойлгон харж суув.~Бүр танаар дайлуулаад муухай юм болж байнаа.Надруу арай л дэндүү их ширтээд байхаар нь эвгүй санагдаад тэгж хэллээ.Тэгтэл эмгэн дахиад л муур шиг дуугаар инээж,~хүүе,яадаг билээ танихгүй хүн шиг...гэдгийм байна.Тэгэхэд л би арай хийж ойлголоо.Намайг хэн нэгэнтэй андуураад байна.Аягүйд бол энэ хөгшин аригчихсан юм байхаадаа?

☆үргэлжлэл бий

Япон хэлнээс орчуулсан А.Дайрийжав

зургийг дараахи хуудаснаас авав.→

http://zexy.net/wedding/c_7770008351/blog/article/163552.html

Ашгүй,та ирэвүү?(Ⅲ)

Маргааш нь галт тэргэнд суугаад,танихгүй хотод буулаа.Эмхтгэлээр дүүрэн цаасан тороо санжуулсаар,хорооллыг нэлд нь тойрлоо.Хөлс зайгүй урсаж,замын цаад тал балран арилах мэт туяалзан долгиотоно.Хэдэн айл хаалгаа нээж өгч,хэдэн айл ширүүхэн шиг үүдний харилцуураа(дотуур холбоо) салгав.Тэр өдөр эмхтгэлээ хаясангүй.Хэд хоногийн дараа гэхэд хаалгыг нь онгойлгуулах шилдэг арга оллоо.
~***дээд сургуулын нийгэм судлалын тэнхимийн Кавасаки байна”гэж тэнхимээ л өөрчлөөд,нэрээ үнэнээр нь хэлэхэд бүр илүү шаламгай болж байлаа.~Зуны даалгаварын сэдэвээр санал асуулга цуглуулж явна.Нийгэм судлалын семинарын судалгаа хийж байгаа юм л даа.Араас нь цуврах тайлбар нь юу ч байсан хамаа алга,гол нь нэрээ хэлэхдээ аль болох шударга,төв шулуун,дасал болоогүй маягтай ярих л чухал байлаа.Үүд нь онгойнгуут~Энийг гуйж байна гээд гүнээ мэхийж эмхэтгэлээ гарт нь атгуулаад арилж өгвөл болох нь тэр.




Цааснууд хорогдох тусам гар,нүүр,шилэн хүзүүгээр пад харлан наранд түлэгдэж байв.Хагас ханцуйтай нимгэн цамцны дүрсээр цагааран үлдсэн биеэ хараад Чикада Хирокотой тавьсан болзоондоо санаа зовнилоо.Хувцасаа тайлахгүй бол борлосон байдал гоё харагдана л даа.Харин тайлчихвал шоолуулах байхдаа?Тэгэх л байх.Тэгээд заримдаа үдээс өмнө гэрээсээ гарч,үл таних хотоор эргэлдэж,тэр хоорондоо хэдэн цаг цамцаа тайлаад цэцэрлэгт хүрээлэн дотор хажуулдаж ч үзлээ.Нэлд нь бүх биеэ борлуулах гэж тэр шүү дээ.
Нарны хурц туяан дор ар нуруугаар час час хатгалах соргог өвсийг мэдрэнгээ,нэг л мэдэхэд Чикада Хироко биш Күсакабэг бодож буйгаа анзаарлаа.Мэдээж тийм балай юм биш л дээ.Күсакабэ тэрнээс хойш хааяад манайхаар орж ирж,өнөөх янзаараа огторгуйн долгионы хэлбэлзлийн тухай номлож,их бурханыхаа гайхамшгийн тухай бурлаа.Хөөж гаргаж ч үзнэ,цаг нөгцөөх гэж яриулаад орхих үе ч байлаа.Түүний ярианд итгэх ямар ч сонирхол байгаагүй хэрнээ,гайхалтай нь түүний хувиршгүй сүсэг бишрэлд байлаа.Надтай нас чацуу байж хэдийд,хэрхэн тэрхүү хачирхалтай шинэ урсгалын шашин номлолтой учирч,ямар шалтгаанаар итгэн биширч,юу бодоод ингэтлээ чин сүсгээр шүтэж байгаа юм болоо?Итгэж,бишрэх юмтай байна гэдэг ямар байдаг бол?Күсакабэг хараад байхад охидод ч,хичээлдээ ч,ажилд ч,мөнгөнд ч сонирхолгүй мэт...Тэр нь хэдий худал хуурмаг байлаа ч итгэх юмтай байна гэдэг маш хүчирхэг юм байдаг юм боловуу?Юу ч үгүй байлаа гээд ер сэтгэл зовнихгүй байхаар дагаа?Ид зуны цэцэрлэгт хүрээлэн дотор цээжин бие нүцгэн амьтан нэг тийм л юм бодож хэвтлээ.


Япон хэлнээс орчуулсан А.Дайрийжав

☆үргэлжлэл бий

зургийг дараахи хуудаснаас авав.→
http://daxiazzz.ti-da.net/e1634148.html

Какүта Мицүёо-Ашгүй,та ирэвүү?(Ⅱ)

Маргаашаас нь эмхтгэлээ тарааж эхэллээ.Уушийн газрын ажил маань таван цагаас байсан болохоор,барагцаагаар хоёр цаг болох үест гэрээсээ гараад,эхлээд ойр хавиар сэлгүүцэн алхаж,тойрч үзлээ.Шуудангийн хайрцаг руу нь шидлэх биш,гэрийн хүний гарт нь шууд атгуулах  ёстой.Тэр зэргийн юм ч амархан байнаа...гэж бодож явлаа.Ямар нэг зүйл хүчээр тулгаж зарах биш,гэртээ оруулаач гэж хэлэх биш,зүгээр л гарт нь дамжуулахад л болно.Гэвч санаснаас амаргүй байлаа.Хонх дараад ,
~дамжуулах зүйл байна! гэж хэллээ гээд хаалга,үүдээ нээгээд өгөх хүн барагтай олдсонгүй.

　　　　　　　　　　　　　　　　　　　
　　　　　　　　　　　　　　　　　　


…~манайх наадахгүйгээр чинь болгоод байгаа!гэж ширүүхэн хариулах юмуу,чимээгүй хонхоо салгачихна.Хэд хэдэн айлаар ороод,хүлээж авахгүй болохоор нь яваандаа уур хүрч эхлэв.
~Юу өгөх гэж байгааг нь ч мэдээгүй байж, яаж болгоод байгаа гэж хэлдэг байнаа.Хаалгаа нээгээд жижигхэн товхимол авчихад чинь юу нь болохгүй байгаа юм бол?
Тэгээд би,``Шууданч байна``,``Буухиа үйлчилгээ байна``гэж худлаа ярьдаг боллоо.
Худлаа хэлэхээр  хаалгаа амархан онгойлгож өгдөг ч,товхимолоо сунгахаар худлаа ярьсан маань дорхноо баригдана.Янзгүй царайлан товхимолыг хүлээж авах нэг нь байх ч,худлаа гэдгийг мэдэнгүүт хаалгаа тас хаачих хүн нь илүү олон байв.Заримдаа бүр цагдаа дуудлаа шүү гэж сүрдүүлэх нь ч байлаа.Цагийн ажил маань эхлэх дөхчихөөд байхад,гар дээрхи товхимолууд бараг хорогдсонгүй.Бухимдаж ядаж байсан болохоор үлдсэн товхимолоо бүгдийг нь гэрлийн шонгийн доорхи хогын цэгт хаячихав.
Шөнө,арван хоёр цаг өнгөрөөгөөд уушийн газрын ажлаасаа тарж иртэл,хонгилд Күсакабэ зогсож байлаа.Ер нь л намайг хүлээж байсан шинжтэй шүү.Хажуугаар нь өнгөрөн гарч өрөөндөө ортол,араас дагаж орж ирээд ,
~Ингэх юм бол ёстой ярихгүй шүү!!гэж тэр хэлдгийм байна.
~Өнөөдрийнхийг төлж чадахгүй гэдгээ хэлчихье!Хаях юмуу ,шуудангийн хайрцаг руу нь чихээд  болчихно гэж бодоод байх шиг байна.Хөөе,бүгд баригддаг юм,за!?Дүрэм зөрчвөл цалин олгохгүй гэдгийг сайн санаж аваарай!!! гэж няхуур нь аргагүй нүдний шилээ өргөнгөө Күсакабэ хэллээ.
~Миний буруу л даа.
Бүр шал төвөгтэй санагдаж эхэлсэн ч,яалт ч үгүй мөнгөтэй болохын тулд дуулгавартайгаар уучлал гуйлаа.
~Маргаашаас эхэлж яг хийнээ.
Күсакабэ тэгж хэлэнгүүт санаа нь амарсан бололтой инээн,ичих ч үгүй тэр дороо тухлаж аваад,шүтдэг шашинаа дахиад л тайлбарлаж гарлаа.Сэрүүцүүлэгчгүй бүгчим халуун өрөөнд нэг ч хөлс дусаалгүйгээр их бурхадын үзэл л гэнэ,огторгуйн урсгалын хүчийг шингээхийн тулд...гээд л мэгзэм мэт хөврүүлж өглөө.


Япон хэлнээс орчуулсан А.Дайрийжав


үргэлжлэл бий☆


зургийг дараахи хуудаснаас авав.→
http://froma.yahoo.co.jp/info/edit/oshigotoguide/301_106_146.html


☆үргэлжлэл бий